0
0 KCSM 2024-04-30 01-12pm
ការិយាល័យធ្វើអត្តសញ្ញាណប័ណ្ណចល័ត ដែលច្នៃឡើងដោយបំពាក់សម្ភារៈបរិក្ខារបច្ចេកទេសលើរថយន្តក្រុងតែមួយ នៃស្នងការដ្ឋាននគរបាលខេត្តកំពត នៅក្នុងខែមេសា ឆ្នាំ ២០២៤ នេះ ចេញប្រតិបត្តិការធ្វើអត្តសញ្ញាណប័ណ្ណជូនសិស្សានុសិស្ស និងប្រជាពលរដ្ឋបានពីរគោលដៅហើយ ជាលទ្ធផល គឺទទួលបានជោគជ័យគួរឲ្យកត់សម្គាល់។ គោលដៅដំបូងទាំងពីរនោះរួមមាន វិទ្យាល័យព្រះរាជសម្ភារៈ និងវិទ្យាល័យវឌ្ឍនវិទ្យា នៅក្នុងក្រុងកំពត ចំណែកចំនួនអ្នកដែលបានធ្វើ លោកមិនទាន់អាចបញ្ជាក់ភ្លាមៗបានទេ។ ជាមួយគ្នានឹងការសាទរ និងកោតសរសើរ ប្រជាពលរដ្ឋនៅក្នុងមូលដ្ឋានផ្សេងៗ ក្រៅពីក្រុងកំពត នៃខេត្តកំពតក៏បានស្នើសុំឲ្យក្រុមការងារចុះទៅដល់មូលដ្ឋានរបស់ពួកគាត់ផងដែរ។
ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ ពន្យល់ថា ការងារធ្វើអត្តសញ្ញាណប័ណ្ណចល័តនេះ ជាដំណាក់កាលដំបូង ដែលមានគោលដៅនៅតាមវិទ្យាល័យក្នុងក្រុងកំពតសិន បន្ទាប់មកការិយាល័យនេះនឹងចល័តទៅគ្រប់វិទ្យាល័យនៅទូទាំងខេត្តកំពត ដើម្បីធ្វើអត្តសញ្ញាណប័ណ្ណជូនសិស្សានុសិស្សដែលគ្រប់អាយុធ្វើអត្តសញ្ញាណប័ណ្ណ ក្នុងគោលបំណងរួមនោះ គឺផ្ដល់សេវាដ៏មានសារសំខាន់មួយនេះឲ្យទៅដល់កៀកស្និទ្ធនឹងពួកគាត់ មិនចាំបាច់ធ្វើដំណើរឆ្ងាយ ចំណាយពេលយូរ និងខាតពេលវេលាក្នុងការសិក្សា។
