0
0 kcsm2023-10-31 03-49pm
ភ្នំពេញៈ ម៉ាឡេស៊ីបានរំកិលពីលេខ ១៧ មកលេខ ១៤ ក្នុងនាមជាប្រទេសមានទំនាក់ទំនងពាណិជ្ជកម្មធំជាមួយកម្ពុជា ដោយក្នុងរយៈពេល ៩ ខែដើមឆ្នាំ ២០២៣ សម្រេចបានទឹកប្រាក់ជិត ៤៨៧ លានដុល្លារ កើនឡើង ៧ ភាគរយបើធៀបរយៈពេលដូចគ្នាឆ្នាំ ២០២២។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា (GDCE)។
ស្ថិតិជញ្ជីងពាណិជ្ជកម្មទំនិញរបស់ GDCE ឱ្យដឹងថា គិតពីខែមករា-កញ្ញា ឆ្នាំ ២០២៣ ការនាំចេញ-ចូលទំនិញរវាងកម្ពុជា និងម៉ាឡេស៊ី មានទឹកប្រាក់សរុប ៤៨៦,៥៩ លានដុល្លារ កើន ៧ ភាគរយបើធៀបនឹងរយៈពេលដូចគ្នាឆ្នាំ ២០២២។ ក្នុងចំនួនខាងលើគឺទំនិញម៉ាឡេស៊ីនាំមកប្រទេសកម្ពុជា ចំនួន ៤១៤,៥៤ លានដុល្លារ កើន ១០,១ ភាគរយ និងកម្ពុជានាំទៅម៉ាឡេស៊ីចំនួន ៧២,០៤ លានដុល្លារ ធ្លាក់ចុះ ៧,៨ ភាគរយ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ នៅថ្ងៃទី ២៥ ខែតុលាថា ក្នុងនាមជាប្រទេសមានប្រជាជនច្រើន សេដ្ឋកិច្ចធំ និងមានរោងចក្រច្រើន គឺម៉ាឡេស៊ីនាំទំនិញជាច្រើនមកកម្ពុជាដែលទំនិញទាំងនោះមួយចំនួនសម្រាប់បំពេញតម្រូវការប្រើប្រាស់ក្នុងប្រទេស និងមួយចំនួនទៀតជាវត្ថុធាតុដើម ឬគ្រឿងផ្សំសម្រាប់កែច្នៃទៅជាផលិតផលសម្រេច ដើម្បីកម្ពុជានាំចេញទៅលក់បន្តនៅទីផ្សារអន្តរជាតិ។
