ភ្នំពេញ ÷ យុវជនពីរនាក់រងរបួសធ្ងន់ស្រាល ក្រោយបើកម៉ូតូទៅបុករថយន្ត ford មួយគ្រឿងនៅក្រោមស្ពាន អាកា ស 7មករា កាលពីវេលាម៉ោង 1:00 យប់រំលងអាធ្រាតឈានចូលថ្ងៃទី 12 ខែវិច្ឆិកាឆ្នាំ 2022 ក្នុងសង្កាត់ទឹកល្អក់មួយ ខណ្ឌទួលគោក រាជធានីភ្នំពេញ។
បើតាមប្រភពព័ត៌មាននៅកន្លែងកើតហេតុបានដឹងថា ដំបូងឡើយគេឃើញបុរសម្នាក់បើករថយន្ត ford មួយគ្រឿង ពណ៌ទឹកក្រូច ពាក់ស្លាកលេខព្រៃវែង 2B-3555 ធ្វើដំណើរតាមបណ្ដោយផ្លូវ 271 លុះមកដល់ក្រោមស្ពានអាកាសប្រាំពីរមករា ក៏បើកឆ្លងចូលផ្លូវ 598 ក៏មានយុវជនពីរនាក់ ជិះម៉ូតូមួយគ្រឿង ម៉ាកឌ្រីមសង់ពណ៌ខ្មៅ ពាក់ស្លាក លេខភ្នំពេញ 1IV-5459 ធ្វើដំណើរតាមបណ្ដោយផ្លូវសហព័ន្ធរុស្ស៊ី ក្នុងទិសដៅពីកើតមកលិច មកបុកពេញទំហឹងចំផ្នែកខាងមុខ បណ្ដាលឲ្យរថយន្តក្រពិត ឯម៉ូតូរងការខូចខាតខ្ទិចមួយកំណាត់មុខដួលពេញផ្លូវ ឯអ្នកបើកបររួមជាមួយនឹងអ្នករួមដំណើរពីក្រោយ រងរបួសធ្ងន់ស្រាលត្រូវបានរថយន្តសង្គ្រោះ ដឹកយកទៅសង្គ្រោះភ្លាមៗនៅឯមន្ទីរពេទ្យ។
ក្រោយកើតហេតុ ក៏មានវត្តមានរបស់សមត្ថកិច្ចជំនាញ នគរបានចរាចរណ៍ផ្លូវគោកខណ្ឌទួលគោក បានចុះមកដល់ទីតាំងកន្លែងកើតហេតុ ធ្វើការវាស់វែងរួចនាំយករថយន្ដនិងម៉ូតូ យកទៅរក្សាទុកដើម្បីរង់ចាំម្ចាស់ ចូលខ្លួនមកដោះស្រាយនៅពេលក្រោយ៕