ភ្នំពេញ ៖ ករណីគ្រោះថ្នាក់ចរាចរណ៍មួយបានកើតឡើងនៅត្រង់ចំណុចម្តុំស្ពាននាគ ជិតវត្តភ្នំ រវាងម៉ូតូអមការពារសុវត្ថិភាពដំណើររបស់គណៈប្រតិភូ និងរថយន្តចំនួន ២គ្រឿងបណ្តាលឱ្យម៉ូតូ និងរថយន្តចំនួន១គ្រឿងរងការខូចខាតនៅព្រឹកថ្ងៃទី១២ ខែវិច្ឆិកា ឆ្នាំ២០២២នេះ។
អ្នកនាំពាក្យរបស់ស្នងការដ្ឋាននគរបាលខេត្តកណ្តាលបានឲ្យដឹងថា «នេះជាករណីគ្រោះថ្នាក់ធម្មតា មិនមែនជាការគ្រោះថ្នាក់ពេលនាំក្បួននោះទេ ព្រោះគាត់ជិះទៅកាន់ទីតាំងដើម្បីដឹកនាំក្បួន»។ ក្រោយកើតហេតុកម្លាំងសមត្ថកិច្ចបាននាំយករថយន្តទាំងពីរគ្រឿងនោះបញ្ជូនមកការិយាល័យចរាចរណ៍។ ករណីគ្រោះថ្នាក់ចរាចរណ៍នេះពុំបានធ្វើឱ្យអ្នកដំណើររងរបួសធ្ងន់ធ្ងរឡើយ ពោលគ្រាន់តែរងការខូចខាតម៉ូតូ និងរថយន្ត។
យោងតាមច្បាប់ស្តីពីចរាចរណ៍ផ្លូវគោក ត្រង់មាត្រា៨១ បានចែងថា ជនណាបើកបរមិនគោរពសញ្ញាបញ្ជារបស់មន្ត្រីមានសមត្ថកិច្ចការពារក្បួនដំណើរគណៈប្រតិភូ ឬថ្នាក់ដឹកនាំជាន់ខ្ពស់បង្កការខូចខាតដល់យានយន្តរបស់ក្បួន ត្រូវផ្តន្ទាទោសដាក់ពន្ធនាគារពី ១ខែ ទៅ ៦ខែ និងពិន័យជាប្រាក់ពី ៨សែនរៀលទៅ ៤លានរៀល៕