0
0 ភ្នំពេញ៖ យុវជនម្នាក់បានស្លាប់ និងម្នាក់ទៀតរងរបួស ខណៈបើកម៉ូតូឌុបគ្នាគេចពីរថយន្តបើកថយចេញពីផ្ទះជ្រុលទៅបុកខឿនចិញ្ចើមផ្លូវដួល ខ្ទាតទៅផ្លូវម្ខាងទៀត ស្របពេលមានរថយន្តបែនដឹកដី បើកបញ្ច្រាសទិសគ្នាមកកិនពីលើ។
ហេតុការណ៍នេះបានកើតឡើង នាព្រឹកថ្ងៃទី២៦ ខែសីហា ឆ្នាំ២០២២ ស្ថិតនៅតាមបណ្តោយផ្លូវហាណូយ សង្កាត់ឃ្មួញ ខណ្ឌសែនសុខ រាជធានីភ្នំពេញ។
សមត្ថកិច្ចបានឲ្យដឹងថា សពជនរងគ្រោះមានឈ្មោះ ឡេង ចាន់ថន អាយុ១៩ឆ្នាំមុខរបរសំណង់(ជួសជុលផ្លូវថ្នល់)មានស្រុកកំណើត ឃុំរមាស ស្រុកក្រគរ ខេត្តពោធិ៍សាត់។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញយុវជន២នាក់ បើកម៉ូតូម៉ាកហុងដាឌ្រីមសង់ពណ៌ខ្មៅពាក់ស្លាកលេខភ្នំពេញ1JI-3720 ជិះឌុបគ្នា តាមបណ្តោយផ្លូវហាណូយ ក្នុងទិសដៅពីត្បូងទៅជើង ស្រាប់តែមកដល់ចំណុចកើតហេតុមានរថយន្តកូរ៉េមួយគ្រឿង បើកថយក្រោយ ឃើញដូចនេះអ្នកបើកម៉ូតូក៏បានគេច មកខាងឆ្វេងដៃ ក៏ជ្រុលទៅបុកខឿនសួនច្បារពុះចែកទ្រូងផ្លូវ បណ្តាលឲ្យដួលខ្ទាតអ្នកជិះពីក្រោយទៅផ្លូវម្ខាងទៀត ស្របពេលមានរថយន្តដឹកខ្សាច់មួយគ្រឿង មិនចាំម៉ាក បើកមកដល់កិនចំខ្លួននឹងក្បាលបណ្តាលឱ្យស្លាប់ភ្លាម ៗ នៅនឹងកន្លែង ។ឯអ្នកបើកបររបួសស្រាល ចំណែករថយន្តដឹកខ្សាច់បានបើករត់គេចបាត់។
បន្ទាប់ពីកើតហេតុកម្លាំងសមត្ថកិច្ចមូលដ្ឋាន សហការជាមួយកម្លាំងជំនាញចរាចរណ៍ចុះមកវាស់វែង នឹងធ្វើកំណត់ហេតុរួចបានប្រគល់សពឲ្យទៅក្រុមគ្រួសារយកទៅធ្វើបុណ្យនៅស្រុកកំណើតតាមប្រពៃណី ៕
