ក្រសួងបរិស្ថានបានរឹបអូសផ្ទៃដីពីបទល្មើសកាប់ទន្ទ្រានដីព្រៃខុសច្បាប់ នឹងជំរុញឲ្យមានការអភិវឌ្ឍដើម្បីបម្រើផលប្រយោជន៍ប្រជាសហគមន៍នៅជុំវិញនោះ
KCSM 2024-09-05 12-54pm
ភ្នំ(ពេញ)រដ្ឋមន្ត្រីក្រសួងបរិស្ថាន អះអាងថា តាមរយៈកិច្ចសហការរវាងក្រសួង និងអាជ្ញាធរមូលដ្ឋាន បានធ្វើការបង្ក្រាប ទប់ស្កាត់ និងឈានទៅដល់ការគ្រប់គ្រងផ្ទៃដីដែលបានរឹបអូសយកមកជាសម្បត្តិរដ្ឋវិញ ហើយត្រូវជំរុញឲ្យមានការអភិវឌ្ឍ ដើម្បីបម្រើផលប្រយោជន៍ទៅដល់ប្រជាសហគមន៍ដែលរស់នៅជុំវិញទីនោះផង ធ្វើយ៉ាងឲ្យពួកគាត់មានជីវភាពកាន់តែប្រសើរឡើង និងជួយការពារព្រៃឈើដែលនៅសល់ផង។
ការអះអាងរបស់ ឯកឧត្ដម អ៊ាង សុផល្លែត រដ្ឋមន្ត្រីក្រសួងបរិស្ថាន ធ្វើឡើងនៅចំពោះមុខអ្នកសារព័ត៌មាន បន្ទាប់ពីបញ្ចប់កិច្ចប្រជុំ ថ្នាក់ដឹកនាំក្រសួងបរិស្ថាន នាទីស្ដីការក្រសួងបរិស្ថាន កាលពីថ្ងៃទី ២៨ ខែសីហា ឆ្នាំ ២០២៤។
សូមជម្រាបផងដែរថា កាលពីពេលកន្លងទៅថ្មីៗនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ប្រកាសដាក់ចេញនូវកម្មវិធីផ្ដល់ដីសម្បទានសង្គមកិច្ចថ្មីមួយទៀតមានឈ្មោះថា «កម្មវិធីផ្ដល់ដី ការពារព្រៃ ដើម្បីរួមគ្នាអភិវឌ្ឍដោយចិរភាព» ក្នុងគោលដៅបន្តដោះស្រាយតម្រូវការរបស់ប្រជាពលរដ្ឋ ដែលខ្វះខាតដីពិតប្រាកដ និងចូលរួមចំណែកទប់ស្កាត់សកម្មភាពទន្ទ្រានដីរដ្ឋ និងការកាប់បំផ្លាញព្រៃឈើ។
សម្ដេចមហាបវរធិបតី ហ៊ុន ម៉ាណែត
ទន្ទឹមនឹងវិធានការទាំង៣ រួមមានការអនុវត្តច្បាប់, ការសហការពីអាជ្ញាធរមានសមត្ថកិច្ច និងការគាំទ្របំពេញបន្ថែមពីដៃគូរពាក់ព័ន្ធ ដែលក្រសួងបរិស្ថានកំពុងអនុវត្ត និងទទួលបានលទ្ធផលល្អប្រសើរនោះ វិធានការដែលរដ្ឋមន្ត្រីបរិស្ថានអះអាងថា ទទួលបានជោគជ័យមួយទៀតនោះគឺ ដាំដើមឈើឲ្យបានច្រើនជាងគេកាប់ ដែលវិធានការនេះសម្រេចបានតាមរយៈយុទ្ធនាការ «មួយលានដើមក្នុងមួយឆ្នាំ»។
ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន
អត្ថបទ៖ ឈិន ធារ៉ាត់