ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថានបានព្រមានជាលើកចុងក្រោយឲ្យមន្ត្រីបរិស្ថានសម្អាតខ្លួនចេញពីអំពើពុករលួយ
KCSM2024-08-29 01-36pm
(ភ្នំពេញ)រដ្ឋមន្ត្រីក្រសួងបរិស្ថានព្រមានជាលើកចុងក្រោយឲ្យមន្ត្រីបរិស្ថានសម្អាតខ្លួនចេញពីអំពើពុករលួយ បើពុំដូច្នោះទេ គឺត្រូវដកតួនាទី និងក្របខណ្ឌ ហើយអាចនឹងប្រឈមចំពោះមុខច្បាប់ផងដែរ។ ការព្រមាននេះធ្វើឡើងនៅចំពោះមុខឯកឧត្ដម លោកជំទាវ លោក លោកស្រីមន្ត្រីបរិស្ថាន រាប់ចាប់តាំងពីអគ្គនាយក អគ្គនាយករង ប្រធាននាយកដ្ឋាន និងប្រធានមន្ទីរបរិស្ថាននៃបណ្ដារាជធានីខេត្ត នៅក្នុងកិច្ចប្រជុំថ្នាក់ដឹកនាំក្រសួងបរិស្ថាន នៅរសៀលថ្ងៃទី ២៨ ខែសីហា ឆ្នាំ ២០២៤ នាទីស្ដីការក្រសួងបរិស្ថាន។
រដ្ឋមន្ត្រីសម្ដីផ្អែម ឯកឧត្ដម អ៊ាង សុផល្លែត ថ្លែងសង្កត់ធ្ងន់លើបញ្ហាបំពុលទឹក ដែលជាបញ្ហាចម្បងដែលនាំឲ្យប៉ះពាល់យ៉ាងធ្ងន់ធ្ងរដល់សុខភាព និងអាយុជីវិតប្រជាពលរដ្ឋ។ ដូច្នេះហើយ មន្ត្រីបរិស្ថានគ្រប់លំដាប់ថ្នាក់ ត្រូវយកចិត្តទុកដាក់គោរពតួនាទី ភារកិច្ចរបស់ខ្លួនឲ្យបានខ្ជាប់ខ្ជួន និងត្រូវអនុវត្តវិធានការច្បាប់យ៉ាងម៉ឺងម៉ាត់ សំដៅការពារមិនឲ្យមានការបង្ហូរកាកសំណល់រាវ និងចោលកាកសំណល់រឹងចូលទៅក្នុងប្រភពទឹក ដែលនាំឲ្យខូចបរិស្ថានទឹក។
រដ្ឋមន្ត្រីបានណែនាំទៅដល់មន្ត្រីក្រោមចំណុះក្រសួងបរិស្ថានទាំងអស់ថា៖
ទី១ មន្ទីរបរិស្ថានរាជធានីខេត្តដែលពាក់ព័ន្ធ និងអំពើពុករលួយ ទទួលប្រាក់ប្រចាំខែពីរោងចក្រ សហគ្រាសដែលល្មើសវិធានបរិស្ថាន ជាថ្នូរនឹងការបិទភ្នែកបិទច្រមុះ មិនអើពើ មិនដឹងឮ ត្រូវបញ្ឈប់ទង្វើស្មោកគ្រោកនេះជាបន្ទាន់។
ទី២ មន្ទីរពិសោធន៍បរិស្ថាន ត្រូវកែតម្រូវនូវចំណុចអសកម្មមួយចំនួន ដែលកើតមានកន្លងមកចេញ។ មិនត្រូវស៊ុមគ្រលុំគ្នាលាក់បាំងលទ្ធផលអវិជ្ជមានដែលបានមកពីការធ្វើពិសោធន៍គុណភាពទឹកនោះទេ។ ការធ្វើបែបនេះ ក៏មិនខុសអ្វីពីការចូលរួមសកម្មភាពល្មើសច្បាប់ដែរ។ សូមគិតថា សុខភាព និងអាយុជីវិតប្រជាជនជាង ១៧ លាននាក់ពឹងពាក់លើមន្ទីរពិសោធន៍ និងមន្ត្រីបរិស្ថានហ្នឹងហើយ។
ទី៣ ត្រូវអនុវត្តវិធានការច្បាប់ជាធរមាន មិនមែនទៅចរចាចំពោះបទល្មើសបរិស្ថាននោះទេ។ កន្លងមកធ្លាប់មានករណីមន្ត្រីបរិស្ថានខ្លះចុះទៅត្រួតពិនិត្យរោងចក្រ សហគ្រាសនៅតាមបណ្ដាខេត្ត ហើយធ្វើរបាយការបង្ហាញរដ្ឋមន្ត្រីតែអំពីចំណុចគួរធ្វើនេះ ធ្វើនោះ ប៉ុន្តែមិនឃើញមានចំណុចខ្វះខាតដែលជាកាតព្វកិច្ចត្រូវបំពេញ ឬមិនឃើញមានចំណុចខុសឆ្គងសោះ ខណៈរដ្ឋមន្ត្រីក៏បានជ្រាបច្បាស់ហើយថាត្រូវធ្វើអ្វី។ ចំណុចនេះ រដ្ឋមន្ត្រីចោទថា តើច្បាប់ និងលិខិតបទដ្ឋានគតិយុត្តិបង្កើតឡើងដើម្បីទៅចរចា ឬបង្ខំឲ្យអនុវត្ត? លោកព្រមានឲ្យបញ្ឈប់ទង្វើនេះជាបន្ទាន់។
ឯកឧត្តម អ៊ាង សុផល្លែត ណែនាំថា ពាក់ព័ន្ធនឹងផ្លូវច្បាប់ អគ្គនាយកដ្ឋានគាំពារបរិស្ថានត្រូវសហការ ឬប្រគល់ឲ្យមេធាវីក្រសួងបរិស្ថានធ្វើការតែម្ដងទៅ សោះតែរំខានពេលវេលាធ្វើការងារមួយចំនួនផ្សេងទៀត។
បើតាមការលើកឡើងរបស់ឯកឧត្ដម ខ្វៃ អាទិត្យា បានឲ្យដឹងថា កន្លងមកមន្ត្រីក្រសួងបរិស្ថានបានខិតខំយកចិត្តទុកដាក់អនុវត្តយុទ្ធសាស្ត្រចក្រាវិស័យបរិស្ថាន ដែលបានដាក់ចេញដោយមានការដឹកនាំចង្អុលបង្ហាញពីសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលផ្ដោតលើសសរស្ដម្ភ៣ គឺ ភាពស្អាត បៃតង និងចិរភាព។
នៅក្នុងកិច្ចប្រជុំថ្នាក់ដឹកនាំក្រសួងបរិស្ថាននេះដែរ ឯកឧត្តម បណ្ឌិត អ៊ាង សុផល្លែត ឆ្លៀតបញ្ជាក់បន្ថែមពីសុខភាពបរិស្ថាន មាន៣ គឺបរិស្ថានលើមេឃ, បរិស្ថានលើដី និង បរិស្ថានក្នុងទឹក។
ចំពោះទី១ បរិស្ថានលើមេឃ គឺខ្យល់នៅកម្ពុជា មិនមានជាតិពុលទេ តាមរយៈការវាស់វែង ជាប្រចាំថ្ងៃរបស់ក្រសួងបរិស្ថាន។
ទី២៖ បរិស្ថានលើដី យើងបានបើកយុទ្ធនាការផ្សព្វផ្សាយ ប្តេជ្ញាចិត្ត និងអនុវត្តដោះស្រាយផលប៉ះពាល់ដល់បរិស្ថាន ជាមួយនឹងការប្ដេជ្ញាចិត្តធ្វើឱ្យបរិស្ថានល្អប្រសើរឡើង។ ដូចជាការកាត់បន្ថយការប្រើប្រាស់ថង់ប្លាស្ទិក យើងមានអ្នកប្ដេជ្ញាចិត្ត ដោយមានអ្នកចូលរួមកាត់បន្ថយ ប្រមាណជាង៩លាន ៥សែននាក់។ ឯកឧត្ដម អ៊ាង សុផល្លែត បានសម្ដែងនូវការជឿជាក់ថា នៅឆ្នាំ ២០២៥ នឹងគ្មានថង់ប្លាស្ទិក ហោះតាមផ្លូវទៀតទេ។ យុទ្ធនាការបន្ទាប់គឺ «កម្ពុជាស្អាត ខ្មែរធ្វើបាន»។
ទី៣៖ បរិស្ថានក្នុងទឹក ក្រសួងបរិស្ថាន កំពុងយកចិត្តទុកដាក់ ដោយដាក់ឧបករណ៍ស្វ័យត្រួតពិនិត្យ គុណភាពទឹកកខ្វក់របស់រោងចក្រសហគ្រាស ធ្វើយ៉ាងណាធានាប្រភពទឹកមានបរិស្ថានល្អ
អត្ថបទ៖ ឈិន ធារ៉ាត់