KCSM2024-05-21 12-44pm
(ភ្នំពេញ)រដ្ឋមន្ត្រីក្រសួងព័ត៌មាន ឯកឧត្ដម នេត្រ ភក្ត្រា បានចេញសារអំពាវនាវឲ្យអ្នកសារព័ត៌មាន និងអ្នកធ្វើមាតិការរកកម្រៃតាមអនឡាញ (MMO) ធ្វើការពិចារណាឲ្យបានហ្មត់ចត់មុននឹងផ្សព្វផ្សាយ ឬឈានទៅដល់ការបញ្ឈប់តែម្ដងនូវការផ្សព្វផ្សាយរូបភាពហិង្សា និងមនុស្សឃាតសាហាវព្រៃផ្សៃ នៅលើបណ្ដាញសង្គមដែលវាបានជះឥទ្ធិពលអវិជ្ជមានច្រើនលើសលប់ជាងផលវិជ្ជមាន។
សាររបស់រដ្ឋមន្ត្រីក្រសួងព័ត៌មាន ដែលចេញនៅលើទំព័រហ្វេសប៊ុកផ្លូវការរបស់លោក កាលពីរសៀលថ្ងៃទី ២០ ខែឧសភាព ឆ្នាំ ២០២៤ មានខ្លឹមសារយ៉ាងនេះ៖
«ជាថ្មីម្ដងទៀត នៅប៉ុន្មានថ្ងៃនេះ, ខ្ញុំបានសង្កេតឃើញថា អ្នកសារព័ត៌មាន និងអ្នកប្រើប្រាស់បណ្ដាញសង្គមមួយចំនួនរួមនឹងក្រុមអ្នកផលិតមាតិកា និងរកប្រាក់តាមអនឡាញ (MMO) បានផ្សព្វផ្សាយ និងចែករំលែកនូវរូបភាពឃាតកម្ម រូបភាពហិង្សានៅលើបណ្ដាញសង្គមហ្វេសប៊ុក តិកតុក និងប្រព័ន្ធតេឡេក្រាម, ខ្ញុំសូមអំពាវនាវ និងស្នើសុំបងប្អូនបញ្ឈប់ការផ្សព្វផ្សាយនូវរូបភាពហិង្សាទាំងនេះ ព្រោះវាប៉ះពាល់កិត្តិយសនៃសព និងដល់ផ្លូវចិត្ត និងអារម្មណ៍របស់ក្រុមគ្រួសារជនរងគ្រោះ ដែលកំពុងតែទទួលរងភាពឈឺចាប់ និងការបាត់បង់សមាជិកគ្រួសារជាទីស្រឡាញ់របស់ខ្លួន។ ជាមួយគ្នានេះ ក៏វាបានធ្វើឱ្យមានការប៉ះពាល់ផ្លូវចិត្ត និងអារម្មណ៍អ្នកប្រើប្រាស់បណ្ដាញសង្គមផ្សេងទៀត ជាពិសេសយុវជន និងកុមារ ករណីពួកគាត់បានប្រទះឃើញរូបភាពទាំងនេះ។ ដើម្បីគោរពដល់ក្រុមគ្រួសារនៃជនរងគ្រោះ និងជនរងគ្រោះ (ផ្ទាល់) បងប្អូនអាចចែករំលែករូបភាពដែលមិនប៉ះពាល់ដល់សេចក្ដីថ្លៃថ្នូរ និងឯកជនភាពរបស់ជនរងគ្រោះ ឬធ្វើឱ្យរូបភាពនោះប្ល័រ (រូបមិនច្បាស់) មុននឹងផ្សព្វផ្សាយ និងចែករំលែក។ ធ្វើដូច្នេះ គឺគោរពក្រមសីលធម៌វិជ្ជាជីវៈផង និងគោរពកិត្តិយសនិងសេចក្ដីថ្លៃថ្នូររបស់ជនរងគ្រោះផង។ ខ្ញុំសង្ឃឹម និងជឿជាក់ថាបងប្អូនអ្នកសារព័ត៌មាន អ្នកប្រើប្រាស់បណ្ដាញសង្គម និងក្រុមអ្នកផលិតមាតិកាមួយចំនួនលើកតម្លៃខ្ពស់ក្នុងការគោរពក្រមសីលធម៌ និងអនុវត្តតាមស្តង់ដារប្រតិបត្តិនៃការផ្សព្វផ្សាយរបស់បណ្ដាញសង្គម និងគោរពឯកជនភាពរបស់បុគ្គល! សូមអរគុណ»
ប្រភព៖ ទំព័រហ្វេសប៊ុកផ្លូវការរបស់ឯកឧត្ដម នេត្រ ភក្ត្រា