KCSM2024-05-15 02-21pm
(ភ្នំពេញ)សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្រេចប្រគល់ភារកិច្ចជូនក្រុមមេធាវីរបស់រាជរដ្ឋាភិបាល ដែលមានឯកឧត្ដម គី តិច ជាប្រធាន ដើម្បីខិតខំការពារប្រជាពលរដ្ឋរងគ្រោះក្នុងករណីចាញ់បោកក្រុមហ៊ុន ប្រ៊ីលានស៊ីធី របស់លោកស្រី ឡេង ចាន់ណា ព្រមទាំងផ្ដល់នូវជំនួយផ្នែកច្បាប់នានាតាមការចាំបាច់ ជាពិសេស ការពារផលប្រយោជន៍របស់ប្រជាពលរដ្ឋតាមផ្លូវតុលាការ។ លោកក៏បានស្នើឲ្យមេធាវីរាជរដ្ឋាភិបាល និងស្ថាប័នមានសមត្ថកិច្ចទាំងអស់ ដែលមានការពាក់ព័ន្ធ ត្រូវខិតខំយកចិត្តទុកដាក់ការពារផលប្រយោជន៍របស់ប្រជាពលរដ្ឋដែលរងគ្រោះនៅក្នុងសំណុំរឿងនេះ ហើយធានានូវការអនុវត្តច្បាប់ឱ្យបានម៉ឺងម៉ាត់ទៅតាមនីតិវិធីជាធរមាន។
លោកបញ្ជាក់ថា រាជរដ្ឋាភិបាល នឹងនៅតែបន្តតាមដានដោយយកចិត្តទុកដាក់លើសំណុំរឿងនេះ។
អ្នកស្រី ឡេង ចាន់ណា ត្រូវបានសមត្ថកិច្ចឃាត់ខ្លួនកាលពីថ្ងៃទី ១២ ខែមីនា និងបញ្ជូនទៅតុលាការ តាមការបញ្ជាពីសម្ដេចធិបតី។ ហើយនៅថ្ងៃទី ១៤ ខែមីនា គោរមងារជាឧកញ៉ារបស់អ្នកស្រី ត្រូវបានបញ្ចប់។ មកដល់បច្ចុប្បន្ននេះ សំណុំរឿងរបស់អ្នកស្រី ឡេង ចាន់ណា កំពុងស្ថិតក្នុងដៃតុលាការ។ អ្នកស្រីត្រូវបានអយ្យកាអមសាលាដំបូងខេត្តសៀមរាបចោទប្រកាន់លើ៣បទល្មើសព្រហ្មទណ្ឌ គឺទី១ ឆបោកមានស្ថានទម្ងន់ទោស ប្រព្រឹត្តដោយក្រុមមានការចាត់តាំង តាមបញ្ញត្តិមានត្រា ៣៧៧ និងមាត្រា៣៨០។ ទី២ ការចេញសែកគ្មានសាច់ប្រាក់ និងទី៣ ការសម្អាតប្រាក់។
ទោះជាយ៉ាងណាក៏ដោយ សម្ដេចធិបតីបញ្ជាក់ថា រាជរដ្ឋាភិបាលនៅបន្តតាមដានករណីនេះជាប្រចាំ និងបានប្រគល់ភារកិច្ចឱ្យសមត្ថកិច្ចពាក់ព័ន្ធបន្តស្រាវជ្រាវ និងសហការគាំទ្រដល់ដំណើរការរបស់តុលាការគ្រប់រូបភាពដែលច្បាប់អនុញ្ញាត ធ្វើយ៉ាងណារួមគ្នាដោះស្រាយបញ្ហាជូនប្រជាពលរដ្ឋឲ្យអស់លទ្ធភាពទៅតាមផ្លូវច្បាប់។
នៅក្នុងទំព័រហ្វេសប៊ុកផ្លូវការរបស់សម្ដេចធិបតី លោកបានលើកឡើងពីសាវតារខ្លះៗ ដែលឈានទៅដល់ឃាត់ខ្លួនលោកស្រី ឡេង ចាន់ណា បញ្ជូនទៅតុលាការភ្ជាប់ជាមួយលិខិតសិទ្ធិប្រទានយ៉ាងនេះថា៖
«ក្រោយពេលដែលឃើញមានផ្សព្វផ្សាយតាមបណ្ដាញសង្គមអំពីករណីទាមទារសំណងរបស់ប្រជាពលរដ្ឋដែលបានវិនិយោគនៅលើគម្រោង ប្រ៊ីលានស៊ីធី នៅខេត្តសៀមរាប របស់អតីតឧកញ៉ា ឡេង ចាន់ណា, នៅក្នុងអំឡុងពាក់កណ្ដាលខែកុម្ភៈ ឆ្នាំ២០២៤ ខ្ញុំបានប្រគល់ភារកិច្ចជូន ឯកឧត្ដម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងដែនដី នគរោបនីយកម្ម និងសំណង់ ក៏ដូចជា ជូនឯកឧត្ដម ប្រាក់ សោភ័ណ្ឌ អភិបាលនៃគណៈអភិបាលខេត្តសៀមរាប និងក្រុមជំនួយការច្បាប់របស់ខ្ញុំដើម្បីស្រាវជ្រាវ ក៏ដូចជារិះរកដំណោះស្រាយលើករណីនេះ។
តាមការប្រគល់ភារកិច្ច, ឯកឧត្ដម សាយ សំអាល់ បានព្យាយាមធ្វើការសម្របសម្រួលជាមួយក្រុមហ៊ុន ក្នុងគោលបំណងរកដំណោះស្រាយជូនប្រជាជនវិញ ទៅតាមលទ្ធភាពដែលអាចទៅបាន និងទៅតាមជំហានដែលអាចធ្វើទៅបាន ប៉ុន្តែដំណោះស្រាយតាមវិធីនេះ ពុំអាចធ្វើទៅបាន។
ជាមួយគ្នានេះ, សមត្ថកិច្ចក៏បានធ្វើការស៊ើបអង្កេត និងស្រាវជ្រាវករណីនេះ ហើយបានរកឃើញថា គម្រោងវិនិយោគរបស់ក្រុមហ៊ុន ប្រ៊ីលានសីធី ពុំមានលក្ខណៈដូចជាគម្រោងវិនិយោគអចលនទ្រព្យផ្សេងទៀត ដែលជាគម្រោងវិនិយោគពិតប្រាកដ ហើយជួបប្រឈមឧបសគ្គជាមួយនឹងបញ្ហានៃការធ្លាក់ចុះទីផ្សារនោះទេ ប៉ុន្តែ ផ្ទុយទៅវិញគម្រោងរបស់ក្រុម ឡេង ចាន់ណា មានលក្ខណៈជាប្រព័ន្ធឆបោកតាមរូបមន្ត Ponzi Scheme ។
ផ្អែកលើលទ្ធផលនៃការស៊ើបអង្កេតនេះ, នៅថ្ងៃទី១២ ខែមីនា ឆ្នាំ២០២៤ ខ្ញុំបានបញ្ជាឱ្យកម្លាំងសមត្ថកិច្ចអនុវត្តច្បាប់ឱ្យបានម៉ឺងម៉ាត់ និងឈានទៅឃាត់ខ្លួនឈ្មោះ ឡេង ចាន់ណា ដើម្បីបញ្ជូនទៅតុលាការតាមនីតិវិធីជាធរមាន។»
អត្ថបទ: សង្គម