Kcsm2023-12-12 02-12pm
សិល្បៈជាតិ៖ ករណីអតីតបេក្ខភាពប្រឡងចម្រៀងក្នុងកម្មវិធីកម្រិតពិភពលោក គឺតារាចម្រៀង ឡាច ណុច ត្រូវបានតុលាការសម្រេចឃុំខ្លួនដាក់ពន្ធនាគារបណ្តោះអាសន្នក្រោមការចោទប្រកាន់ពីបទ លួចមានស្ថានទម្ងន់ទោស (ឆក់ខ្សែក) ។
តាមចៅក្រមស៊ើបសួរសាលាដំបូងរាជធានីភ្នំពេញ លោកស្រី យី សុខវួច កាលពីថ្ងៃទី១០ ខែធ្នូឆ្នាំ២០២៣ បានចេញដីកាឃុំខ្លួនជនត្រូវចោទឈ្មោះ ឡាច ណុច មុខរបរអ្នកចម្រៀងតាមភោជនីយដ្ឋាន ដាក់ពន្ធនាគារព្រៃសម១ បណ្តោះអាសន្នក្រោមការចោទប្រកាន់ពីបទ លួចមានស្ថានទម្ងន់ទោស (ឆក់ខ្សែក) ។
គួររំលឹកថា វេលាម៉ោង ២០និង១៥ នាទី ថ្ងៃទី០៤ ខែធ្នូ ឆ្នាំ២០២៣ អ្នកចម្រៀង ឡាច ណុច ដែលជាជនសង្ស័យបានចេញធ្វើសកម្មភាពលួចដោយហិង្សាមានស្ថានទម្ងន់ទោស (ឆក់ខ្សែ-ក) នៅចំណុចផ្លូវលេខ១៩៩កែង៣៣៨ សង្កាត់ទួលស្វាយព្រៃទី១ ខណ្ឌបឹងកេងកង នៅពេលដែលជនរងគ្រោះកំពុងធ្វើដំណើរតាមផ្លូវ ស្រាប់តែត្រូវបានជនសង្ស័យជិះមកជិត ហើយធ្វើសកម្មភាពឆក់យកខ្សែ-ក បម្រុងជិះគេចខ្លួន ហើយបានទៅបុកជាមួយម៉ូតូមួយគ្រឿងទៀតបណ្ដាលឱ្យដួលបង្កការភ្ញាក់ផ្អើលដល់ប្រជាពលរដ្ឋ និងកម្លាំងមូលដ្ឋានអាវុធហត្ថខណ្ឌបឹងកេងកង ចុះអន្តរាគមន៍ឃាត់ខ្លួនបានជនសង្ស័យភ្លាមៗតែម្តង និងចាប់យកវត្ថុតាង ខ្សែក ០១ខ្សែ ប្រគល់ជូនជនរងគ្រោះវិញផងដែរ។ ឡាច ណុច ដែលអ្នកចម្រៀងតាមភោជនីយដ្ឋានភេទប្រុស អាយុ២១ឆ្នាំ បានទទួលសារភាពថា ខ្លួនពិតជាបានធ្វើសកម្មភាព ឆក់ខ្សែកពីជនរងគ្រោះ នៅចំណុចខាងលើ ពិតប្រាកដមែន។
ភ្ជាប់ជាមួយករណីនេះដែរ មហាជនអ្នកលេងបណ្ដាញសង្គមមួយចំនួន បានបង្ហាញអារម្មណ៍សោកស្ដាយចំពោះអ្នកចម្រៀង ឡាច ណុច មិនគួរណាគិតខុសមួយពេលបណ្ដោយខ្លួនឱ្យប្រព្រឹត្តិទង្វើដែលនាំឱ្យខូចបង់អនាគតបែបនេះសោះ។ ហើយករណីនេះដែរក៏ក្លាយជាឧទាហរណ៍យ៉ាងសំខាន់ចំពោះអ្នកចម្រៀងជំនាន់ក្រោយ កុំឱ្យភ្លើតភ្លឺន ឬផុងខ្លួនប្រព្រឹត្តិតាម ព្រោះថារឿងនេះមិនត្រឹមតែប៉ះពាល់ដល់អនាគតនោះទេ សូម្បីតែប្រជាប្រិយភាពក្នុងវិស័យសិល្បៈក៏ត្រូវស្រអាប់ដែរ ឬក៏មិនអាចវិលចូលមកប្រឡូកសិល្បៈវិញក៏អាចថាបានដែរ៕
ប្រភព សង្គម
