KCSM 2023-01-30 01-39pm
(កណ្តាល)កាលពីថ្ងៃ២៨ ខែមករា ឆ្នាំ២០២៣ អ្នកសារព័ត៌មាន ម្នាក់ ត្រូវបានប៉ូលិសអន្តោប្រវេសន៍ ច្រកក្អមសំណ ស្រុកលើកដែក ខេត្តកណ្តាល ធ្វើការឃាត់ខ្លួនទាំងបំពាន នាំយកទៅប៉ុស្តិ៍និងបង្ខំឱ្យផ្តិតមេដៃ ធ្វើកិច្ចសន្យា។
ករណីខាងលើនេះ ធ្វើឡើងបន្ទាប់ពីអ្នកសារព័ត៌មាន រូបនោះ បានឃើញនិងបានថតនៅរូបភាពឈ្មួញម្នាក់ ដែលបានធ្វើសកម្មភាពលួចដឹកជញ្ជូនបារីគេចពន្ធ (ម៉ាកបាយ័ន) ដឹកជញ្ជូនតាមម៉ូតូចេញពីកម្ពុជាទៅវៀតណាម ក្នុងមូលដ្ឋានច្រកក្អមសំណ ស្រុកលើកដែក ខេត្តកណ្តាល ត្រង់ចំណុចទល់មុខប៉ុស្តិ៍កុងត្រូល ។
អ្នកសារព័ត៌មាន ដែលត្រូវបានប៉ូលីសអន្តោប្រវេសន៍ ឃាត់ខ្លួននោះ បានរៀបរាប់តាមដំណើររឿងថា៖ បន្ទាប់ពីថតរូបភាពការលួចដឹកជញ្ជូនបារីរួចមក ខ្លួនក៏បានរាយការណ៍ព័ត៌មានទៅមន្ត្រីគយនៅមូលដ្ឋានច្រកក្អមសំណដើម្បីសូមឱ្យអន្តរាគមន៍ តែផ្ទុយទៅវិញបែរជាគ្មានការអន្តរាគមន៍នោះទេ! ស្រាប់តែមួយសន្ទុះក្រោយមកបែរជាមានកងកម្លាំងនគរបាលអន្តោប្រវេសន៍មួយក្រុមធំមានគ្នាប្រមាណជាង១០នាក់ ជិះម៉ូតូដេញតាមគាត់ រួចក៏ស្ទាក់ផ្លូវហើយធ្វើសកម្មភាពមកដកសោរម៉ូតូ ឡោមព័ទ្ធគាត់ ដូចក្រុមចោរប្លន់ ថែមទាំងគំរាមសំឡុត ហើយពេលនោះក៏មានប៉ូលីសអន្តោប្រវេសន៍ ឈ្មោះ ប្រា ម៉េងលី មកប្រតាយប្រតប់ឆក់យកទូរស័ព្ទ ដៃពីគាត់ជាអ្នកសារព័ត៌មានទៀតផង។
អ្នកសារព័ត៌មានដដែលរូបនោះ បានបន្ថែមទៀតថា៖ បន្ទាប់ពី ក្រុមប៉ូលិសអន្តោប្រវេសន៍ឃាត់ខ្លួនគាត់យកទៅដល់ប៉ុសិ៍អន្តោប្រវេសន៍ ពេលនោះឈ្មោះ ងួន ម៉ាដូរ៉េ តួនាទីសេនាធិការច្រកអន្តោប្រវេសន៍ ក៏បានបង្គាប់បញ្ជាគាត់មិនឱ្យបញ្ចេញនូវរូបភាព ដែលខ្លួនថតបាននៅក្នុងមូលដ្ឋាន ហើយថែមទាំងបង្ខំគាត់ជាអ្នកសារព័ត៌មានឱ្យផ្តិតមេដៃធ្វើកិច្ចសន្យា ក្នុងការមិនបញ្ចេញរូបភាព។
សំណួរសួរថា៖ ហេតុអ្វីបានជាក្រុមប៉ូលិសអន្តោប្រវេសន៍ ច្រកកម្ពុជាវៀតណាម ក្អមសំណ ស្រុកលើកដែក ខេត្តកណ្តាល ទាំងអស់នោះ នាំគ្នាមកធ្វើសកម្មភាពឃាត់ខ្លួនអ្នកសារព័ត៌មានលើដងផ្លូវជាសារធារណៈ ទាំងដែលអ្នកសារព័ត៌មានគ្មានកំហុស គ្មានបានប្រព្រឹត្តអំពើល្មើសច្បាប់អ្វីផងនោះ។ ចំណែកឯក្រុមឈ្មួញរកស៊ីដឹកជញ្ជូនបារីខុសច្បាប់ បែរជាមិនទៅចាប់ មកចាប់អ្នកសារព័ត៌មាន ដែលជាភ្នែកជាច្រមុះរបស់អស់លោកទៅវិញ។
នេះជាការរំលោភលើអ្នកសារព័ត៌មានយ៉ាងធ្ងន់ធ្ងរបំផុត ហើយក៏ជាការគំរាមកំហែងយ៉ាងខ្លាំងដល់សិទ្ធិមនុស្សនៅកម្ពុជា ដែលកម្ពុជាជាប្រទេសប្រជាធិបតេយ្យសេរីពហុបក្ស ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
មហាជននិងអ្នកសារព័ត៌មានជាច្រើន សូមអំពាវនាវទទូចស្នើសុំដល់សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ និងស្នើដល់ថ្នាក់ដឹកនាំគ្រប់ជាន់ថ្នាក់គ្រប់ស្ថាប័នពាក់ព័ន្ធ មេត្តាជួយអន្តរាគមន៍លើករណីខាងលើនេះផង និងសូមជួយរកយុត្តិធម៌ជូនដល់អ្នកសារព័ត៌មាន ដែលរង់ការរំលោភបំពានពីសំណាក់មន្ត្រីខាងលើនេះផងទាន៕ប្រភពកងមាស
